50A Dienasboađut ja geahpádusat mat dain dahkkojit, deavdinráva

Dárkkis ovdadevdojuvvon vearroalmmuhusa. Almmut dieđuid dain dienasboađuin ja dienasboađuin dahkkon geahpádusain, mat váilot ovdadevdojuvvon vearroalmmuhusas dahje mat leat das boastut.

Dán rávvagis muitaluvvo, mo almmuhat dákkár dienasboađuid báberskoviin 50A.

Báberskovi 50A oaččut skovvesiiddus. Máhcahančujuhus lea merkejuvvon skovi ovdasiidui.

Skoviin 50A sáhtát almmuhit ja divvut ovdamearkka dihte čuovvovaš dieđuid:

• bálkkát, mávssut ja buhtadusat 
• ealáhagat 
• ovddut
• eará dienasboađut
• bargomárkanservviid lahtto- ja bargguhisvuođakássamávssut 
• bálkáboađuid boađuskáhppongolut
• ealihanmávssut
• bárragaskavuođa nuppástusat

Sáhtát almmuhit dieđuid maid elektrovnnalaččat OmaVeros. Dalle it dárbbaš báberskovi. Loga rávvaga almmuheamis OmaVeros. Dárbbu mielde sáhtát geavahit maid dán deavdinrávvaga veahkkin.

Fuomáš, ahte olgoriikkain bargojuvvon barggu dienasboađuid galgá almmuhit sierra, olgoriikkaboađuid oktavuođas. Sáhtát almmuhit daid OmaVeros dahje báberskoviin. Juos geavahat báberskovi, almmut olgoriikka dienasboađuid skoviin 16A (Čilgehus olgoriikkaboađuin, dienasboađut).

Geavat dán skovi 50A maid dalle, juos dagat njulgengáibádusa vearuheami nohkama maŋŋá. Deavdde njulgengáibádusa ja bija mielddusin skovi 50A. Sáhtát dahkat njulgengáibádusa maid OmaVeros. Dalle ii dárbbaš báberskovi.

Juos ozat vearuheami njulgema dahje divut juo ovdal addon dieđu, deavdde skovis oppa dan oasi, man dieđu divut. Skovi osiid oainnát sisdoalus:. 

Deavdde dása iežat nama ja persovdnanummira.

Almmut maiddái vearrojagi dahjege dan jagi, mas almmuhat boađuid dahje geahpádusaid.

2 Bálkkát, mávssut ja buhtadusat

Almmut bálkkáid, mávssuid ja buhtadusaid, mat váilot ovdadevdojuvvon vearroalmmuhusas dahje maid hálidat divvut.

Almmut ovdamearkka dihte dáid:

• ruhtabálkkát
• lunddolaš ovddut, dego
  • telefon-, viste-, borramuš- ja biilaovdu
  • bargogaskavuođamátkebileahta vearuvuloš oassi
  • biilastálle
  • asttuáiggevisti
  • mohtorfanas
  • luopmo- dahje bálkkašanmátki
  • bálkán gehččon bargoveahkaloana reantoovdu
  • bálkán gehččon oadjomávssut
  • ovdu bargogaskavuohtaoptios
• bálkkát ja buhtadusat, maid leat ožžon bargo- dahje virgegaskavuođas
• bargo- ja geavahanbuhtadusat
• bargomearrái vuođđuduvvi juogadus, mii vearuhuvvo bálkán
• bálkálágan mávssut, ovdamearkka dihte oapmahašdivššu doarjja
• čoahkkinbálkkát
• vearuvuloš goluid buhtadusat, maid leat ožžon ovdamearkka dihte gieldda bearašbeaivedikšun
• priváhta bearašbeaivedikšu bargobuhtadus, juos it gula ovdabearranregistarii
• bálkán gehččon oassi eaktodáhtolaš ealáhatoadjomávssuin, maid bargoaddi lea váldán
• Olgoriikalaš bargoaddi máksin bálká, man leat bargan Suomas

Juos bálkkát, mávssut dahje buhtadusat váilot ovdadevdojuvvon vearroalmmuhusas dahje hálidat divvut muhtin dieđu, almmut álo buot čuovvovaš dieđuid:

• máksi F-nummir dahje persovdnanummir 
• máksi namma 
• čilgehus das, mii boađuid lea gažaldagas 
• boađu mearri brutton (bruttoboahtu lea dat boahtu, mas ii leat vel geahpeduvvon vearru)
• boađus dahkkon ovdavearrogeassin 
• bákkolaš ealáhatoadjomávssut, maid bargoaddi bearrá
• bákkolaš bargguhisvuođamávssut, maid bargoaddi bearrá

Juos leat fitnodat- dahje fidnobargi, almmut fitnodatdoibmii laktáseaddji bargobuhtadusaid fitnodat- ja fidnobargi vearroalmmuhusas dahjege skoviin 5.

Juos barggat boađuskáhppondoaimmaid ja ovdadevdojuvvon vearroalmmuhusas váilot bargobuhtadusat, almmut váilu bargobuhtadusaid skoviin 11 (Boađuskáhppondoaibma).

Vearrohálddahus oažžu dieđu bargobuhtadusain maiddái daid máksiin. Juos boađuskáhppondoibmii laktáseaddji bargobuhtadusa dieđut leat jo fárus ovdadevdojuvvon vearroalmmuhusas muhto dieđuin lea feaillat, divo bargobuhtadusaid dieđuid dáinna skoviin dahjege skoviin 50A.

Almmut boađuskáhppondoibmii laktáseaddji goluid skoviin 11.

Almmut boađuid ja goluid skoviin 11 ovdamearkka dihte dalle, juos leat priváhta bearašbeaivedikšu ja gulat ovdabearranregistarii.

Loga lasi ealáhusdoaimmas, boađuskáhppondoaimmas ja asttuáiggedoaimmas.

3 Biilaovddu árvvu vuolideapmi

Juos gáibidat biilaovddu árvvu vuolideami, merke vuolideami vuođuštusa mearkkain. Juos priváhtavuojut leat čoggon vuollel 18 000 km jagis, merke mearkka čuoggái “Gáibidan biilaovddu vuolideami priváhtavuojuid vuođul”. Almmut maiddái priváhtavuojuid kilomehtermeari. Seaillut vuodjinbeaivegirjji iežat duohken.

Juos gáibidat biilaovddu vuolideami eará siva geažil, merke rmearkka čuoggái “Eará sivva biilaovddu árvvu vuolideapmái”. Almmut bargui laktáseaddji vuojuid kilomehtermeriid, juos bargovuojut leat badjel 30 000 kilomehtera jagis ja gáibidat biilaovddu vuolideami dainna vuođuštusain.

4 Ealáhagat

Almmut ovdadevdojuvvon vearroalmmuhusas váilu ealáhagaid dahje divo ealáhatdieđuid.

Almmut čuoggás Suomas ožžojuvvon ealáhagaid, ovdamearkka dihte

• bargo- ja fitnodatealáhagaid
• álbmotealáhatlága miel ealáhagaid
• dáhkádusealáhagaid
• dáhkádusaide vuođđuduvvi ealáhagaid, mat vearuhuvvojit dienasboahtun

Almmut ealáhagas buot čuovvovaš dieđuid:

• máksi F-nummir dahje persovdnanummir
• máksi namma
• čilgehus das, mii ealáhagaid lea gažaldagas
• ealáhaga mearri brutton (bruttoboahtu lea dat boahtu, mas ii leat vel geahpeduvvon vearru)
• ealáhagas dahkkon ovdavearrogeassin.

5 Ovddut

Almmut ovdadevdojuvvon vearroalmmuhusas ovdduid, mat váilot dahje divo dieđuid.

Almmut ovdamearkka dihte čuovvovaš ovdduid

• dietnasii čatnašuvvan beaiveruhta
• vuođđobeaiveruhta
• bargomárkandoarjja

• vánhemiidbeaiveruhta

• ruoktodikšundoarjja
• oahpporuhta
• buohcanbeaiveruhta
• rávesolbmuidskuvlendoarjja
• Kela máksin gaskaboddosaš epidemiijadoarjja
• Njoammudávdabeaiveruhta

Almmut ovdduin buot čuovvovaš dieđuid:

• máksi F-nummir dahje persovdnanummir 
• máksi namma
• čilgehus das, mii ovdduid lea gažaldagas
• ovddu mearri bruttoboahtun (bruttoboahtu lea dat boahtu, mas ii leat vel geahpeduvvon vearru)
• ovdavearrogeassin.

6 Eará dienasboađut

Almmut dán čuoggás deivvolaš eará dienasboađuid, mat eai Ieat bargogaskavuođas ožžojuvvon boađut eaige bargobuhtadusat ja mat váilot ovdadevdojuvvon vearroalmmuhusas. Eará dienasboađut leat ovdamearkka dihte

• veahkkeruđat áigeáji- ja áhppásmahttindoaimma várás
• gávdnanbálká dahje gilvobálká
• dienasboađut virtuálaruđa laigumis (proof of work-protokolla). Loga lasi virtuálaruđaid vearuhusas.

Almmut dáidda dienasboađuide laktáseaddji boađuskáhppongoluid čuoggás ”Ovdduide ja eará dienasboađuide guoskevaš golut”.

Vearrohálddahus oažžu dieđu digitála vulloža bokte du fidnen boađuin sihke Suomas ja olgoriikkas ja gohcá dáid dieđuid almmuheami vearuhusas. Juos leat vuovdán persovnnalaš bálvalusa (ovdamearkka dihte čábbodatdikšun- dahje čorgenbálvalusa) vulloža bokte eará vulloža geavaheaddjiide, almmut du fidnen boađuid skoviin 50A. Juos du fidnen boađut leat juo fárus ovdadevdojuvvon vearroalmmuhusas, muhto dieđuin leat feaillat, sáhtát maiddái divvut boađuid dieđuid skoviin 50A.

Juos oaččut vearrojagi áigge máŋggaid boahtoeriid seamma doaimmas, almmut ovdadevdojuvvon vearroalmmuhusas váilu doaimma boađuid ja dasa guoskevaš geahpádusaid skoviin 11 (Boađuskáhppondoaibma).

Loga lasi boađuskáhppondoaimma vearuhusas.

Almmut veahkkeruđaid ja daidda guoskevaš goluid skoviin 10 (Veahkkeruđat).

7 Gáibádus boađudássemis dahje ealáhatboađu juohkimis áigodagaide

Merke dása mearkka, juos gáibidat boađuid juohkima áigodagaide ja boađudássema.

Sáhtát gáibidit boađudássema, juos leat ožžon vearrojagis ovttaháválaš prestašuvdnan unnimustá 2 500 euro dienasboađu, mii lea

• čoggon ovddalgihtii dahje maŋŋá guovtti dahje máŋgga jagis

• unnimustá njealjádas jagi buhtes dienasboađuid oktasaš logus.
  Buhtes dienasboahtu dárkkuha buot dienasboađuid oktasaš logu, mas lea geahpeduvvon boađuskáhppongolut.

Boađudássema ferte gáibidit ovdal go vearrojagi vearuhus nohká.

Lavtte fárrui mávssu máksi duođaštusa ovttaháválaš boađus (ovtta háve mákson boahtu) ja dan máksima vuođuštusain.

Juos leat gáibidan boađudássema juo ovdabearramis ja boađudássen lea gáibádusa vuođul váldon vuhtii nuppástusvearrokoartta rehkenastimis ja ovdavearu doaimmaheamis, don it dárbbaš gáibidit ođđasit boađudássema.

Lassedieđut boađudássemis dienasboađuid vearuhusas

Sáhtát gáibidit ealáhatboađuid juohkima áigodagaide, juos guktot čuovvovaš eavttuin ollašuvvet:

• Leat jagi áigge ožžon máhccevaš ealáhaga unnimustá 500 euro.
• Máhccevaš ealáhat čuohcá unnimustá 3 mánu áigodahkii vearrojagi ovddabealat áigái

Ealáhatboađuid juohkima áigodagaide ferte gáibidit ovdal go vearrojagi vearuhus nohka.

Lavtte fárrui buot máhccevaččat mákson ealáhagaide laktáseaddji mearrádusaid.

Juos leat gáibidan ealáhatboađuid juohkima áigodagaide juo ovdabearramis ja juohkin áigodagaide lea gáibádusa vuođul váldon vuhtii nuppástusvearrokoartta rehkenastimis ja ovdavearu doaimmaheamis, don it dárbbaš gáibidit ođđasit juohkima áigodagaide.

Lassedieđuid oaččut rávvagis Ealáhatboađuid vearuhus.

8 Geahpádusat mat dahkkojit dienasboađuin

8.1 Vearumáksinnávccaid hedjonangeahpádus

Dán čuoggás sáhtát gáibidit vearumáksinnávccaid hedjonangeahpádusa. Geahpádus lea árvvoštallama vuložin ja gáibida erenomáš siva, omd. buohcuvuođa, bargguhisvuođa dahje ealihangeatnegasvuođa.

Geahpádus sáhttá leat eanemustá 1 400 euro.

Vearumáksinnávccaid hedjonangeahpádusa sáhttá mieđihit dušše stuorra buohcuvuođa goluid vuođul, juos

• du ja du bearašlahtuid oktiirehkenaston buohcuvuođa golut leat vearrojagis unnimustá 700 euro
• buohcuvuođa golut leat seammás unnimustá 10 % buhtes dienas- ja oaiveopmodatboađuid oktasaš logus. Buhtes dienasboahtu dárkkuha buot boađuid oktiibuot, main leat geahpeduvvon boađuskáhppongolut

Geahpádusa mieđiheapmái váikkuhit buot bearašlahtuid boađut ja opmodat.

Juos gáibidat geahpádusa buohcuvuođa goluid vuođul, merke mearkka čuoggái “Buohcuvuohta” ja almmut goluid meari čuoggás “Gollu”. Seaillut goluid duhtosiid iežat duohken.

Juos gáibidat geahpádusa eará vuođuštusain, merke mearkka čuoggái “Eará sivva (omd. bargguhisvuohta, ealihangeatnegasvuohta)”. Almmut dutnje šaddan goluid čuoggás “Gollu”.

Merke maiddái goluid oktiirehkenaston meari.

Oahpásnuva dárkileabbot geahpádusa meriide ja vuođuštusaide

8.2 Eará go bálkkáid bákkolaš ealáhatoadjomávssut

YEL – dahje MYEL – oadjomávssut

Almmut ieš mákson bákkolaš ealáhatoadjomávssuid (YEL- ja MYEL – oadjomávssut), juos it leat almmuhan daid eanandoalu, vuovdedoalu dahje ealáhusdoaimma vearroalmmuhusas (2, 2C dahje 5.) Almmut maiddái veahkkeruđaoažžu bákkolaš MYEL- oadjomávssuid, juos dat váilot ovdadevdojuvvon vearroalmmuhusas.

Sáhtát almmuhit bákkolaš YEL- ja MYEL – oadjomávssuid juogo iežat dahje beallalačča vearuhusas. Mávssut geahpeduvvojit dan beallalačča dienasboađuin, guhte lea gáibidan geahpádusa (juogo skoviin 50A dahje OmaVero-bálvalusas). Gáibádusa ferte ovdanbuktit ovdal go vearrojagi vearuhus nohka.

Almmut dás maiddái iežat máksinoasi kollektiivvalaš ealáhatoadjomávssuin ja valáštalli eaktodáhtolaš ealáhat- dahje bárteoadjomávssuin.

Olgoriikii mákson ealáhat- ja bargguhisvuođaoadjomávssut sihke beaiveruhtamáksu

Almmut dás maiddái bálkkáin olgoriikii mákson bákkolaš ealáhat- ja bargguhisvuođaoadjomávssut sihke beaiveruhtamáksu.

8.3 Bargomárkanservviid lahtto- ja bargguhisvuođakássamávssut

Juos vearroalmmuhusas váilot bargomárkanservviid ja bargguhisvuođakássa lahttomávssut dahje dieđuin leat feaillat, almmut buot lahttomávssuid oktasaš meari, maid leat máksán jagi áigge čuoggás “Bargomárkanservviid dahje bargguhisvuođakássa lahttomávssut oktiibuot/jahki”.

Merke maiddái dan bargomárkansearvvi dahje bargguhisvuođakássa nama dahje F-dovddaldaga, man dieđut váilot dahje leat boastut.

8.4 Bálkáboađuid boađuskáhppongolut

Juos dus leat bálkáboađut, oaččut automáhtalaččat 750 euro boađuskáhppongeahpádusa.

Geahpádus ii sáhte goit leat stuorát go du bálkáboađuid mearri.

Almmut boađuskáhppongoluid dušše, juos golut leat eambbo go 750 euro. Merke boađuskáhppongoluid olles mearrin: ále geahpet dain minsttarvuloš 750 euro geahpádusa.

Juos leat juo árat almmuhan boađuskáhppongoluid ja hálidat divvut oasi 8.4 ovttaskas dieđu, almmut buot dieđuid ođđasit maid leat árat dán oasis almmuhan, dušše boastto dieđu divvun dahje ođđa dieđu lasiheapmi ii reahkká. Almmut goluid olles jagis.

Skuvlengolut

Merke skuvlengoluid meari, maid leat máksán vearrojagi áigge. Geahpedangelbbolaš skuvlengolut leat ovdamearkka dihte studerengolut, mat leat šaddan ámmátdáiddu bajásdoallamis.

Bargolatnjageahpádus

Juos barggat iežat ruovttus, almmut minsttarvuloš bargolatnjageahpádusa dahjebargolanjas šaddan duođalaš goluid. Bargolatnjageahpádusa mearri lea das gitta, man olu geavahat bargolanja váldo- dahje oasseáigásaš bargamii vearrojagi áigge. Geahpádusa sáhttá mieđihit albma goluid mielde dušše, juos ovdanbuvttát dain dárbbašlaš čilgehusa. Loga lasi bargolatnjageahpádusas ja bargolatnjageahpádusa mearis.

Bargobiergasat

Almmut goluid materiálain ja iežat bargobiergasiid geavaheamis, ovdamearkka dihte telefongoluid ja bargo- dahje virgegárvvuid goluid.

Lassánan eallámušgolut, mat leat šaddan bargomátkkiin

Almmut bargomátkkiin šaddan lassánan eallámušgoluid. Dat sáhttet leat ovdamearkka dihte govttolaš badjelmearálaš boradangolut ja golut go doalat oktavuođa ruoktot.

Eará golut

Almmut eará geahpedangelbbolaš goluid, ovdamearkka dihte luohttámušolmmošmávssuid.

Bálkáboađuid boađuskáhppongolut oktiibuot

Rehkenastte oktii bálkáboađuide laktáseaddji boađuskáhppongoluid, maid leat almmuhan skovis, oktii ja deavdde supmi dasa.

Loga lasi boađuskáhppongoluin mat geahpeduvvojit dienasboađuin

8.5 Eará go bálkáboađuid boađuskáhppongolut

Eará bargoboađuid boađuskáhppongolut

Almmut eará bargoboađuide go bálkkáide guoskevaš boađuskáhppongoluid olles jagis. Eará bargoboahtun dárkkuhuvvo buhtadus, mii ii leat bálká, muhto ovdamearkka dihte bargobuhtadus dahje bearaš- ja oapmahašdikšu bálká. Almmut dán čuoggás ovdamearkka dihte soabadalli gollobuhtadusa ja bearaš- ja oapmahašdikšu goluid buhtadusaid sihke bearašbeaivedikšui čuohcci goluid, juos barggat priváhta bearašbeaivedikšun itge gula ovdabearranregistarii.

Almmut dán čuoggás virtuálaruđa laigumii guoskevaš goluid.
Loga lasi virtuálaruđaid vearuhusas.

Ovdduide ja eará dienasboađuide laktáseaddji golut

Almmut dákko oppa jagi áiggis dakkár boađuid, mat gusket ovdduide ja eará dienasboađuide. Ovdduide laktáseaddji goluid sáhtát geahpedit dušše spiehkastatdáhpáhusain. Fuomáš maid, ahte dábálaš eallámušgoluid ii sáhte geahpedit vearuhusas. Loga lasi ii-gelbbolaš geahpidangoluin.

Áiggeájidoaimmaide laktáseaddji goluid sáhttá almmuhit eanemustá seamma veardde go leat ožžon áiggeájidoaimmain boađuid.

Almmut dán čuoggás maid ealihanveahkkeruhtii (bargostipeanda) laktáseaddji goluid.

Loga lasi veahkeruđaide guoskevaš goluin.

Eará boađuskáhppongolut – vállje rivttes skovi

Almmut čuozáhat- dahje golloveahkeruđaide guoskevaš goluid skoviin 10 (Veahkkeruđat)

Almmut bargolatnjageahpádusa skoviin 19 (Bargolatnjageahpádus). Sáhtát geahpedit mákson láiggu bargolatnjageahpádussan.

Almmut boađuskáhppondoibmii laktáseaddji goluid skoviin 11 (Boađuskáhppondoaibma).

Almmut oaiveopmodatboađuide laktáseaddji boađuskáhppongoluid skoviin 50B (Oaiveopmodatboađut ja geahpádusat mat dain dahkkojit). Geavat skovi 11 ovdamearkka dihte dalle, juos barggat priváhta bearašbeaivedikšun ja gulat ovdabearranregistarii.

8.6 Eará geahpádusat

Skeaŋkageahpádus

Almmut iežat dahkan skeŋkemis. Skeŋkengeahpádusa sáhttá dahkat 850-500 000 euro ruhtaskeŋkemis, man leat skeŋken diehtaga dahje dáidaga ovddideapmái dakkár Eurohpa ekonomiijaguovllu universitehtii dahje allaskuvlii dahje universitehtafondii, mii oažžu almmolaš ruhtadeami. Merke dán čuoggái

• skeaŋkka oažžu nama
• skeaŋkka meari euroiguin

Loga lasi skeaŋkageahpádusas

Ruovttoluottabearrangeahpádus

Juos dus lea berrojuvvon ruovttoluotta ovdu, ovdamearkka dihte oahpporuhta, almmut ruovttoluotta berrojuvvon meari dás.

9 Máksojuvvon ealihanmávssut

Almmut vearrojagi mákson ealihanmávssuid meari.
Almmut maiddái daid mánáid persovdnanummiriid, main mávssát ealihanmávssuid.

Sáhtát oažžut ealihangeatnegasvuođageahpádusa, juos

• • ealihanveahkki vuođđuduvvá máná ealiheapmái, mas lea láhkanjuolggadusvuloš soahpamuš dahje duopmu
• mánná ii leat ovdal vearrojagi álggu deavdán 17 jagi. 

Geahpádus lea ⅛ máksojuvvon ealihanveahkis, goit eanemustá 80 euro jagis juohke agivuloš mánás.

Juos leat almmuhan ealihanmávssuid árat ja dat leat merkejuvvon riekta ovdadevdojuvvon vearroalmmuhussii, don it dárbbaš almmuhit daid ođđasit.

Loga lasi ealihangeatnegasvuođageahpádusas

10 Riikkaidgaskasaš dilit

Gáibidan, ahte adnojuvvon vearrosoahpamuša mielde olgoriikkas ássin

Merke mearkka dán čuoggái, juos leat Suomas almmolaččat vearrogeatnegas, muhto vearrosoahpamuša mielde ássanriika lea eará go Suopma.

Loga lasi rávvagis almmolaš ja ráddjejuvvon vearrogeatnegasvuohta (Čuoggás Ohcamuš ássamis vearrosoahpamuša mielde).

Gáibidan ráddjejuvvon vearrogeatnegasvuođa

Merke mearkka dán čuoggái, juos ásat olgoriikkas ja leat Suomas ráddjejuvvon vearrogeatnegas.

Loga lasi rávvagis almmolaš ja ráddjejuvvon vearrogeatnegasvuohta (Čuoggás Ohcamuš ráddjejuvvon vearrogeatnegasvuođas).

Gáibidan vearuhusas luoitima dahje geahpádusa vearrosoahpamuša studeanta-, oahpaheaddji- dahje dutki artikla vuođul

Merke mearkka dán čuoggái, juos leat olgoriikkas Supmii boahtán studeanta, oahpaheaddji dahje dutki ja gáibidat vearrosoahpamuša vuođul vearuhusas luoitima dahje geahpádusa iežat vearuhussii.

Loga lasi olgoriikkas boahtti studeanttaid vearuhusas

Loga lasi olgoriikkas Supmii boahtti dutkiid ja oahpaheaddjiid vearuhusas

Mus lea ássanstáhta A1- duođaštus dahje vástideaddji duođaštus

Merke mearkka dán čuoggái, juos barggat Suomas ja juos dus lea duođaštus das, ahte gulat iežat ássanstáhta sosiáladorvvu biirei (omd. A1- dahje E101-duođaštus).

Gáldovearrogeahpádus

Merke dán čuoggái barganáigodagaid, juos leat ráddjejuvvon vearrogeatnegas láigobargi ja gáldovearrogeahpádus váilu ovdadevdojuvvon vearroalmmuhusas dahje geahpádusa mearri lea boastut. Merke skovvái maiddái barganbeivviid meari oktiibuot. Juos leat gáibidan progressiivvalaš vearuhusa gáldovearuhusa sadjái, dán čuoggá ii dárbbaš deavdit.

Loga lasi olgoriikalaš láigobargi vearuhusas

Olgoriikkaide máksojuvvon vearu buhtadus (jorggubuhtadus)

Dihto vearrosoahpamušaid mielde duppal vearuhus sihkkojuvvo eret dan stáhtas, gos boahtu lea ožžojuvvon. Dat gohčoduvvo jorggu buhtadussan.

Juos ásat Šveiccas, Thaieatnamis dahje Itálias ja leat ožžon Suomas ealáhaga, mii vuođđuduvvá sosiáladorvoláhkaaddimii, almmut dákko vearu meari, maid leat máksán ealáhagas iežat ássanstáhtii.

Sáhtát gáibidit jorggu buhtadusa, juos ásat Espánnjas ja oaččut ealáhaga Suomas. Almmut dákko ealáhaga vearu meari, man leat máksán Espánnjai. Lassedieđut Espánnja ođđa vearrosoahpamuša vuloš jorggu buhtadusa birra, (rávvagis Ealáhat Suomas Espánnjai). 

11 Bárragaskavuođa nuppástus

Juos don ja du beallalaš leahppi fárren vearrojagi áigge bissovaččat sierra danin, go eahppi šat eale ovttas, merke čuoggái dan beaivvi, go leahppi fárren sierra.

Beaivát ja vuolláičále skovi. Almmut maiddái telefonnummira, mas du fáhte beaivit.