Suomi.fi-viestah já šleđgâhámásâš viärupostâ olmoošäššigâssáid

Taat raavâ kuáská priivaat ulmuid, iäláttâshárjutteijeid, eennâmtuálu hárjutteijeid já meccituálu hárjutteijeid.

Virgeomâhái reeivah toimâttuvvojeh tuše šleđgâhäämist puohháid, kiäh kevttih šleđgâhámásijd almos ášástâllâmpalvâlusâid. Taan siijđost tun kaavnah tiäđuid já ravvuid tast, et maht šleđgâhámásij ášástâllâmpalvâlusâi kevttim vaaigut tunjin jieškote-uv tilálâšvuođâin.

Jis tun lah olesahasâš ige tust lah vala Suomi.fi-viestah aanoost, te tun finniih palvâlus anon siämmást, ko tubdâttâđah Suomi.fi-tubdâttâtmáin ovdâmerkkân OmaVeron tâi monnii nube virgeomâháá ášástâllâmpalvâlusân (ovdâmerkkân OmaKanta tâi OmaKela).

Tubdâttâttâm ohtâvuođâst tunjin ráhtoo automatlávt šleđgâhámásâš postâloová Suomi.fi-viestáid.
Suomi.fi-viestah lii Digi- já aalmugtiätuvirgáduv palvâlus, moos tun finniih jieškote-uv virgeomâhái vuolgâttem reeivâid, miärádâsâid já rekigijd. Siämmáš äšši ij vuolgâttuu pááppárpostân.
Tun puávtáh luuhâđ Suomi.fi:n puáttám reeivâid Suomi.fi-moobiilheiviittâssáin tâi viermisiijđoin suomi.fi/viestit. Luođii Suomi.fi-heiviittâs jieijâd puhelimân.
Suomi.fi-viestah vuolgât tunjin almottâs uđđâ reeivâst, jis lah lasettâm jieijâd šleđgâpostâčujottâs palvâlusân tâi suovvâm almottâsâid Suomi.fi-heiviittâsâst.

Viäruhaldâttuv vuolgâttem reeivah, miärádâsah já eres äššikirjeh láá ain OmaVerost iäge toh vuolgâttuu Suomi.fi:n. Tun finniih Suomi.fi-viestâst tuše tiäđu, et tun lah finnim OmaVero uđđâ viärupoostâ.

Huámmáš: Tun sirduuh šleđgâhámásii virgeomâhâšpoostâ vuástávälden automatlávt, ko tubdâttâđah mon peri almoshaldâttuv ášástâllâmpalvâlusân Suomi.fi-tubdâttâtmáin. Stuárráámus uási virgeomâhái vuolgâttem reeivâin puátá tast maŋa tuše šleđgâhäämist Suomi.fi-viestáid.

Ko tun čáládâđah OmaVeron 1.6.2026 maŋa já valjiih liiŋkâ Hoida omia veroasioita (tipšo jieijâd viäruaašijd), te sun sirduuh automatlávt šleđgâhámásii viärupoostâ vuástávälden. Tun finniih Viäruhaldâttuv vuolgâttem reeivâid já miärádâsâid tuše OmaVeron, iäge toh vuolgâttuu innig pááppárpostân. Veikkâ tun liččih meddâlistám Suomi.fi-viestâid kiävtust, mut tipšoh jieijâd viäruaašijd OmaVerost, te tun finniih viärupoostâ tuše OmaVeron.

Almoot OmaVerost jieijâd šleđgâpostâčujottâs tâi puhelinnummeer, te finniih Viäruhaldâttuvâst almottâs jieijâd valjim vuovvijn, talle ko finniih OmaVeron uđđâ reeivâ, miärádâs tâi tábáhtume.

Návt tun adelah OmaVerost jieijâd ohtâvuotâtiäđuid almottâsâi várás

Čáládât OmaVeron já valjii liiŋkâ Hoida omia veroasioita (tipšo jieijâd viäruaašijd).
Tun uáináh Tervetuloa (Tiervâpuáttim) -siijđo. Celkkâl Ilmoita yhteystiedot veropostia varten (almoot ohtâvuotâtiäđuid viärupoostâ várás) -liiŋkâst, te peesah almottiđ jieijâd ohtâvuotâtiäđuid.
Almoot šleđgâpostâčujottâs tâi puhelinnummeer. Tun puávtáh almottiđ meid kuábbáá-uv. Viäruhaldâttâh vuolgât tunjin taan ohtâvuotâtiätun viestâ, ko tunjin lii OmaVerost uđđâ miärádâs tâi reivâ. Tun puávtáh táátud mield valjiđ, et jieh almoot ohtâvuotâtiäđuidâd. Talle tun jieh finnii OmaVerost almottâs uđđâ viärupoostâst.
Jis tun almottah puhelinnummeer, te tust koijâduvvoo, et halijdah-uv, et puhelinnummeer peividuvvoo jieijâd tiäđoid. Valjii Kyllä (kale) tai Ei (ij). Jis valjiih Kale, te tunjin puáhtá táárbu mield leđe puhelimáin ohtâvuođâst, jis tuu viäruttâs várás tarbâšuvvojeh lasetiäđuh. Jieijâs tiäđoid vyerkkejum puhelinnummeer kiävttoo čuávuváid aššijd:
- Tot uáinoo valmâšin viärualmottâsâin, ucâmušâin já vuoigimvátámušâin, maid poorgah OmaVerost.
- Viäruhaldâttuv virgeulmuuh pyehtih táárbu mield suáittiđ toos.
- Viäruhaldâttâh puáhtá vuolgâttiđ toos tekstâviestâid.
Tun jieh finnii innig pááppárreeivâid Viäruhaldâttuvâst. Tun finniih jieijâd almottem ohtâvuotâtiätun viestâ, ko OmaVerost lii tunjin uđđâ viärupostâ.
Jis halijdah, te tun puávtáh almottiđ OmaVerost maŋgâ šleđgâpostâčujottâs. Ovdâmerkkân jis halijdah, et kiinii tuu aldaaš olmooš finnee almottâsâid tunjin puáttám viärupoostâst, te puávtáh lasettiđ suu ohtâvuotâtiäđuid Asiakastiedot (Äššigâstiäđuh) -koskâloostâst saajeest Veroasioita hoitavien henkilöiden sähköpostiosoitteet (viäruaašijd tipšoo ulmui šleđgâpostâčujottâsah).

Nubástus šadda vuáimán tállân.

Huám! Jis tust lii Suomi.fi-viestah aanoost, te tun finniih reeivâst ain Suomi.fi-viestâ. Jis tun lah almottâm OmaVerost šleđgâpostâčujottâs já/tâi puhelinnummeer, te finniih siämmáá reeivâst meid šleđgâpoostâ já/tâi tekstâviestâ Viäruhaldâttuvâst. Nuuvtpa tun puávtáh finniđ siämmáá reeivâst maŋgâ almottâs.

Jis šleđgâhámásâš ášástâllâm oro epivisesin, te tun puávtáh váldásmittiđ nube ulmuu tipšođ tuu viäruaašijd já tipšođ tuu viärupoostâst. Váldásmittiđ puáhtá porgâđ Suomi.fi-palvâlusâst.

Raavâ: Suomi.fi-váldásmittem viäruaššijd – tánávt adelah já táátuh váldásmittem (suomâkielân)

Ele luovât paŋkkitubdâlduvâidâd nube ulmui pic keevti váldásmittem. Váldásmittem lii tiätutorvolub vyehi. Ko tuu aldaaš ulmust lii Veroasioiden hoito (Viäruaašij tipšom) -váldásmittem, te sun čáládât OmaVeron jieijâs tubdâlduvâiguin. Sun puáhtá tipšođ tuu viäruaašijd OmaVerost já sun piäsá meid luuhâđ reeivâid já miärádâsâid tuu peeleest.

Viäruaašij tipšom -váldásmittem adelem tuu aldaaš ulmui ij tuálvu tust alnestâd maiden vuoigâdvuođâid meddâl ige vaaigut toos, et finniih-uv viärupoostâ pááppárhäämist vâi šleđgâhäämist. Váldásmittem addel nube ulmui máhđulâšvuođâ tipšođ tuu viäruaašijd tuu peeleest táárbu mield.

Ton lasseen tun puávtáh adeliđ nube ulmui meid taggaar Suomi.fi-váldásmittem, mon vievâst váldásmittum olmooš puáhtá kevttiđ tuu peeleest Suomi.fi-viestâid. Ravvuuh Suomi.fi:st: Nube ulmuu peeleest ášástâllâm já eromâštilálâšvuođah (suomâkielân).

Ele keevti jieijâd aldaaš ulmuu paŋkkitubdâlduvâid, pic táátu sust váldásmittem viäruaašij tipšom várás. Váldásmittem lii tiätutorvolub vyehi. Ko tuu aldaaš olmooš addel tunjin Suomi.fi:st Veroasioiden hoito (Viäruaašij tipšom) -váldásmittem, tun čáládâđah OmaVeron jieijâd tubdâlduvâiguin. Tun puávtáh tipšođ jieijâd aldaaš ulmuu viäruaašijd OmaVerost já peesah meid luuhâđ reeivâid já miärádâsâid suu peeleest.

Ko tun ášástâlah nube ulmuu peeleest OmaVerost Viäruaašij tipšom -váldásmitmáin, te puávtáh almottiđ jieijâd šleđgâpostâčujottâs Asiakastiedot (Äššigâstiäđuh) -koskâloostâst saajeest Veroasioita hoitavien henkilöiden sähköpostiosoitteet (Viäruaašijd tipšoo ulmui šleđgâpostâčujottâsah). Tast maŋa tun finniih tiäđu jieijâd šleđgâpoostân, ko váldásmittem adeleijei lii OmaVerost uđđâ viärupostâ.

Veikkâ tun tiilááččih almottâsâid jieijâd šleđgâpoostân, te tot ij vaaigut toos, moin naalijn váldásmittem adeleijee jieš finnee Viäruhaldáttuv vuolgâttem reeivâid. Persovnlii viärupoostâ toimâttemvyehi muttoo pááppárreeivâin šleđgâhámásâžžân tuše talle, ko olmooš jieš čáládât OmaVeron persovnlijn tubdâttâttâmniävuidiskuin, ovdâmerkkân moobilnanodâssáin já tipšo jieijâs viäruaašijd.

Huámmáš, et jis tust alnaad ij vala lah Suomi.fi-viestah aanoost, te tun finniih taid anon automatlávt OmaVeron tubdâttâttâm ohtâvuođâst. Tunjin ráhtoo šleđgâhámásâš postâloová Suomi.fi-viestáid já tun finniih puátteevuođâst olssâd kyeskee virgeomâhâšpoostâ tohon.

Ko tust lii Viäruaašij tipšom -váldásmittem, te tun puávtáh táárbu mield porgâđ OmaVerost váldásmittem adeleijee peeleest almottâs pááppárhámásii viärupoostâ valjiimist. Talle viärupostâ puátá váldásmittem adeleijei ain pááppárhäämist.

Návt tun poorgah almottâs pááppárhámásii viärupoostâ valjiimist

Čáládât OmaVeron já valjii tom ulmuu, kiän peeleest halijdah porgâđ almottâs.
Äššigâstiäđuh-koskâloostâst valjii saje Ilmoitus paperisen veropostin valitsemisesta (almottâs pááppárhámásii viärupoostâ valjiimist).
Koččâmušân Valitsetko paperisen veropostin? (Valjiih-uv pááppárhámásii viärupoostâ?) valjii: Vahvistan, että valitsen paperisen veropostin (Mun nanodâm, et valjiim pááppárhámásii viärupoostâ).

Jis váldásmittem adeleijee jáámá, te poostâ toimâttemvyehi muttoo pááppárhámásâžžân. Siämmást meddâlistojeh puoh toh šleđgâpostâčujottâsah, moh láá lasettum Viäruaašijd tipšoo ulmui šleđgâpostâčujottâsah -liiston. Nuuvtpa váldásmittum olmooš ij innig pyevti finniđ šleđgâpostâalmottâsâid jáámmám ulmuu viäruaašijn.

Jis tun lah vuálá 18-ihásâš, te tun finniih jieijâd viärupoostâ pááppárhäämist. Jis halijdah Viäruhaldâttuv reeivâid já miärádâsâid šleđgâhäämist, te tun puávtáh väldiđ anon Suomi.fi-viestâid, jis tust lii syemmilâš persovntubdâldâh já moobilnanodâs tâi paŋkkitubdâlduvah.

Ko tust lii aanoost Suomi.fi-viestah, te tun finniih virgeomâhái vuolgâttem reeivâid tuše šleđgâhäämist. Vyeliahasâžžân tun jieh pyevti almottiđ ohtâvuotâtiäđuid OmaVerost šleđgâhámásii viärupoostâ várás.

Vyeliahasii párnáá aitârdeijen tun puávtáh almottiđ jieijâd šleđgâpostâčujottâs OmaVerost, jis halijdah finniđ Viäruhaldâttuvâst almottâsâid párnáá viärupoostâst. Lasseet šleđgâpostâčujottâs Äššigâstiäđuh-koskâloostâst saajeest Veroasioita hoitavien henkilöiden sähköpostiosoitteet (Viäruaašijd tipšoo ulmui šleđgâpostâčujottâsah).

Vyeliahasâš finnee jyehi tááhust Viäruhaldâttuv reeivâid pááppárpostân, jis sust ij lah Suomi.fi-viestah aanoost.

Aitârdeijen tun puávtáh meid väldiđ Suomi.fi-viestâid anon vyeliahasii párnáá peeleest. Raavâ Suomi.fi:st: Nube ulmuu peeleest ášástâllâm já eromâštilálâšvuođah (suomâkielân).

Priivaat hiäđukoccee já hiäđukocceemváldádâš finnejeh viärupoostâ ain pááppárreivân. Toin roolâin tun puávtáh kuittâg almottiđ šleđgâpostâčujottâsâd OmaVerost, vâi finniih almottâs, ko hiäđukocceem vuálásâš olmooš lii finnim OmaVeron reeivâ, miärádâs tâi tábáhtume. Šleđgâpostâčujottâs lasettem tahhoo Äššigâstiäđuh-koskâloostâst saajeest Veroasioita hoitavien henkilöiden sähköpostiosoitteet (Viäruaašijd tipšoo ulmui šleđgâpostâčujottâsah).

Jis hiäđukocceem vuálásii ulmust lii Suomi.fi-viestah aanoost, te sun finnee Suomi.fi-viestân tiäđu reeivâst, mii lii vuolgâttum hiäđukoccei.

Priivaat hiäđukoccest lii tiätu tilálâšvuođâin roolâs vuáđuld vuoigâdvuotâ ášástâllâđ Suomi.fi-viestâin hiäđukocceem vuálásii ulmuu peeleest. Raavâ Suomi.fi:st: Hiäđukocceem (suomâkielân).

Jis tust lii aanoost Suomi.fi-viestah já/tâi šleđgâhámásâš viärupostâ, mut halijdah-uv sirduđ maasâd finniđ pááppárreeivâid Viäruhaldâttuvâst já eres virgeomâháin, te tun koolgah tilálâšvuođâst sorjon toohâđ oovtâ tâi kyehti almottâs.

Jis kiävtust lii sehe Suomi.fi-viestah já viärupostâ tuše OmaVeron

Toovâ OmaVerost Almottâs pááppárpoostâ valjiimist. Almottâs tahhoo Äššigâstiäđuh-koskâloostâst.
Almoot Suomi.fi-viestâi asâttâsâin, et jooskah Suomi.fi-viestâi kevttim. Raavâ Suomi.fi:st: Viestâi kevttim joskâm (suomâkielân).

Suomi.fi:st pááppárpostâvaljim lii vyeimist 365 peivid häävild. Ton ääigi tun puávtáh kevttiđ šleđgâhámásijd virgeomâhâšpalvâlusâid já finniih poostâ liijká pááppárhäämist. Ko 365 peivid lii kuullâm, te tun finniih virgeomâhâšpoostâ oppeet šleđgâhäämist, jis tubdâttâđah monnii palvâlusân jieijâd tubdâlduvâiguin.

Jis kiävtust lii tuše Suomi.fi-viestah

Almoot Suomi.fi-viestâi asâttâsâin, et jooskah Suomi.fi-viestâi kevttim. Raavâ Suomi.fi:st: Viestâi kevttim joskâm (suomâkielân). Tun finniih tast maŋa reeivâid pááppárhäämist Viäruhaldâttuv lasseen meid eres virgeomâháin.

Pááppárpostâvaljim lii vyeimist 365 peivid häävild. Ton ääigi tun puávtáh kevttiđ šleđgâhámásijd virgeomâhâšpalvâlusâid já finniih poostâ liijká pááppárhäämist. Ko 365 peivid lii kuullâm, te tun finniih virgeomâhâšpoostâ oppeet šleđgâhäämist, jis tubdâttâđah monnii palvâlusân jieijâd tubdâlduvâiguin.

Jis tust lii váddu, mon keežild jieh pyevti ollágin kevttiđ OmaVero, te puávtáh almottiđ tast Viäruhaldâttuv äššigâspalvâlusâst.

Jis tun varriih meddâl Suomâst, te finniih ain-uv šleđgâhámásii viärupoostâ. Jis tun jieh pyevti varrim maŋa innig čáládâttâđ OmaVeron, te toovâ ovdil varrim sehe almottâs pááppárpoostâ vuástáväldimist OmaVeron já meid almottâs Suomi.fi-viestâi kevttim joskâmist. Toin naalijn tun visásmitáh, et finniih viärupoostâ já eres virgeomâhâšpoostâ puátteevuođâst pááppárreivân.

Tust lii ovdâsvástádâs toollâđ OmaVerost ääigi tääsist šleđgâpostâčujottâsâid tâi puhelinnummeer, moid Viäruhaldâttâh vuolgât almottâsâid uđđâ viärupoostâst. Vuorkkii OmaVeron tuše tagarijd ohtâvuotâtiäđuid, moid uážžu vuolgâttiđ almottâsâid viärupoostâst.

Návt tun almottah uđđâ šleđgâpostâčujottâs já/tâi puhelinnummeer OmaVerost

Čáládât OmaVeron já valjii Hoida omia veroasioita (tipšo jieijâd viäruaašijd).
Valjii koskâloostâ Asiakastiedot (Äššigâstiäđuh) – Yhteystiedot veropostia varten (Ohtâvuotâtiäđuh viärupoostâ várás).
Valjii puálu Päivitä yhteystietoja (Peivid ohtâvuotâtiäđuid).
Čääli šleđgâpostâčujottâs já/tâi puhelinnummeer.

Huámmáš, et Suomi.fi:n šleđgâpostâčujottâs ij pyevti mutteđ OmaVero peht. Jis halijdah almottiđ Suomi.fi:n uđđâ šleđgâpostâčujottâs, te toovâ tom njuolgist Suomi.fi-viestâi asâttâsâin.

Jis tun halijdah mutteđ šleđgâpostâčujottâs OmaVerost kiännii nube peeleest, te tooimâ návt

Tust kalga leđe Veroasioiden hoito (Viäruaašij tipšom) -váldásmittem.
Čáládât OmaVeron já valjii tom ulmuu, kiän peeleest halijdah toohâđ almottâs.
Valjii koskâloostâ Asiakastiedot (Äššigâstiäđuh) – Yhteystiedot veropostia varten (Ohtâvuotâtiäđuh viärupoostâ várás).
Valjii puálu Päivitä yhteystietoja (Peivid ohtâvuotâtiäđuid).
Čääli šleđgâpostâčujottâs já/tâi puhelinnummeer.

Suomi.fi-viestâi ravvuuh

Mii lii Suomi.fi-viestah? (Suomi.fi)

Mii aavhijd Suomi.fi-viestâin já šleđgâhámásii viärupoostâst lii?

Viestâdem lii tiätutorvolâš já lyetittettee.
Tun finniih uđđâ tiäđu Viäruhaldâttuvâst já eres virgeomâháin jotelávt.
Tun puávtáh ášástâllâđ ääigist já saajeest sorjohánnáá.
Teháliih virgeomâhái vuolgâttem viestah láá oovtâ saajeest.
Digitallâš viestâdem lii pirrâsân ustevlub ko pááppárpostâ.
Nubástus puáhtá šiäštuid almos ruttâtuálun.

Tun uáináh viärupoostâ toimâttemvyevi OmaVerost

Tun puávtáh tärhistiđ OmaVerost, et toimâttuvvoo-uv tuu viärupostâ OmaVeron vâi poostâ peht:

Čáládât OmaVeron já valjii Hoida omia veroasioita (tipšo jieijâd viäruaašijd).
Valjii koskâloostâ Asiakastiedot (Äššigâstiäđuh).
Tun uáináh tiäđu saajeest Postin toimitustapa (Poostâ toimâttemvyehi).

Návt tun kaavnah reeivâid já miärádâsâid OmaVerost

Tun finniih jieijâd šleđgâpoostân, puhelimân tâi Suomi.fi-heiviittâsân almottâs, et OmaVerost lii tunjin uđđâ viärupostâ. Täin viestâin ij kuássin lah liŋkkâ njuolgist palvâlusân.
Čáládât OmaVeron (lekkâs uđđâ koskâloostân).
Valjii koskâloostâ Yhteydenpito (Ohtâvuođâ toollâm).
Valjii saajeest Päätökset ja kirjeet (Miärádâsah já reeivah) liiŋkâ Avaa päätökset ja kirjeet (Leehâ miärádâsâid já reeivâid).

Listoost láá puoh miärádâsah já reeivah, maid tun lah finnim 12 mánuppaje ääigist.
Paijeel 12 mánuppaijeed puáris, lekkum tâi arkkâdistum miärádâsâid tun kaavnah tuše uuccâmtooimâ kevttimáin.

Viäruttâsmiärádâs tun kaavnah listoost, jis miärádâs lii vaalmâš.
Jis tun jieh kaavnâ miärádâs jieijâd persovnlii puátuviäruttâs várás, te tuu viäruttâstiäđuh láá vala kieđâvuššâmnáál já toh sättih muttuđ tuu viäruttâs nuuhâmpeeivi räi. Mij vuolgâttep viäruttâsmiärádâsâid majemustáá roovvâdmáánu loopâst.