Digitallâš vuosâsajasâšvuotâ: Reeivah tuše šleđgâhäämist ive 2026
Viäruhaldâttuv já eres virgeomâhái reeivah toimâttuvvojeh tuše šleđgâhäämist ive 2026 rääjist puohháid, kiäh kevttih šleđgâhámásijd ášástâllâmpalvâlusâid, tego OmaVero.
Tääl poostâ šleđgâhámásâš toimâttemvyehi vuáđuduvá mietâmâšân ađai valjiimân väldiđ kiävtun Suomi.fi-viestâid tâi irâttâs šleđgâhámásii viärupoostâ. Joođoost leijee lahâasâttemnubástusâi ooleest poostâ toimâttemvyehi nubástuuččij šleđgâhámásâžžân puohháid toid, kiäh kevttih šleđgâhámásijd ášástâllâmpalvâlusâid. Pááppárreeivâid finniiččii tuše toh, kiäh iä keevti šleđgâhámásijd palvâlusâid.
Maht já kuás reeivâi toimâttemvyehi muttoo?
Jis laavâ vuáimán puáđidijn iä lah vala kiävtust Suomi.fi-viestah tâi irâttâs šleđgâhámásâš viärupostâ, te nubástus tábáhtuvá čuávuvávt:
- Persovnäššigâs tâi toimânommâirâtteijee: Ko tun čáládâđah OmaVeron tâi monnii eres virgeomâháá ášástâllâmpalvâlusân 12.1.2026 tâi tast maŋa, te tun finniih jieškote-uv virgeomâhái reeivâid, miärádâsâid já rekigijd puátteevuođâst tuše šleđgâhäämist. Viäruhaldâttuv reeivâid já miärádâsâid tun finniih tuše OmaVeron. Tun finniih almottâs uđđâ reeivâin ovdâmerkkân šleđgâpostáin, jis lah almottâm šleđgâpostâčujottâs.
- Siärvádâh, ohtsâšovdâdâs, ovtâstume tâi ärbipeesi, mast lii Y-tubdâldâh: Ko viäruaašijd tipšoo olmooš čáládât OmaVeron 12.1.2026 tâi tast maŋa, te siärvádâh, ohtsâšovdâdâs, ovtâstume tâi ärbipeesi finnee puátteevuođâst Viäruhaldâttuv reeivâid já miärádâsâid tuše šleđgâhäämist OmaVeron. Almottâs uđđâ reeivâin puátá šleđgâpoostâ peht, jis tun lah almottâm tađe várás šleđgâpostâčujottâs.
Persovnäššigâs tâi toimânommâirâtteijee: Suomi.fi-viestah sajanpiäjá pááppárreeivâid
Jis tun kiävtáh jo Suomi.fi-viestâid, te tun finniih puátteevuođâst-uv reeivâid já miärádâsâid šleđgâhäämist.
Jis tun jieh lah váldám Suomi.fi-viestâid kiävtun, te tun finniih palvâlus kiävtun 12.1.2026 tâi tast maŋa siämmást, ko tubdâttâđah ovdâmerkkân OmaVeron, Palkka.fi:n tâi puáturegisterân. Tubdâttâttâm ohtâvuođâst tunjin ráhtoo automatlávt šleđgâhámásâš postâloová Suomi.fi-viestáid. Taat nubástus kuáská olesahasijd priivaatulmuid já toimânommâirâtteijeid.
Suomi.fi-viestah lii Digi- já aalmugtiätuvirgáduv palvâlus, moos jieškote-uv virgeomâhái vuolgâttem reeivah, miärádâsah já rekigeh puátih. Keevâtlávt tun finniih Viäruhaldâttuv já maaŋgâi eres virgeomâhái vuolgâttem poostâ puátteevuođâ tuše šleđgâhäämist. Siämmáš äšši ij vuolgâttuu maŋeláá pááppárpostân.
Suomi.fi-viestáid puáttám reeivâid puáhtá luuhâđ Suomi.fi-moobilheiviittâssáin tâi viermisiijđoin suomi.fi/viestit. Viäruhaldâttuv vuolgâttem reeivah, miärádâsah já eres äššikirjeh láá ain OmaVerost iäge toh vuolgâttuu Suomi.fi:n. Tun kaavnah taid OmaVerost Yhteydenpito-koskâloostâst (Ohtâvuođâ toollâm) saajeest Päätökset ja kirjeet (Miärádâsah já reeivah).
Tun finniih tiäđu uđđâ reeivâin viestáin, jis tun lah almottâm tađe várás šleđgâpostâčujottâs Suomi.fi-viestáid tâi šleđgâpostâčujottâs tâi puhelinnummeer OmaVerost. Jis tun jieh almoot ohtâvuotâtiäđuid viestâ várás, te tun ferttiih jieš čuávvuđ Suomi.fi-viestâid já OmaVero, vâi finniih tiäđu uđđâ reeivâin.
Jis tun jieh pyevti väldiđ reeivâid vuástá šleđgâhäämist
Tun finniih reeivâid Viäruhaldâttuvâst já eres virgeomâháin puátteevuođâst-uv pááppárpostân, jis tun jieh 12.1.2026 rääjist keevti OmaVero jiehke tubdâttât eres ášástâllâmpalvâlussáidgin.
Jis tun vist halijdah sirduđ Suomi.fi-viestâin maasâd pááppárpoostâ vuástávälden, te tun puávtáh almottiđ tast Suomi.fi-viestâi asâttâsâin. Tun finniih kuittâg Viäruhaldâttuv vuolgâttem reeivâid ain-uv šleđgâhäämist, jis tun lah tubdâttâttâm OmaVeron 12.1.2026 maŋa. Tun puávtáh almottiđ Viäruhaldâttâhân ovdâmerkkân OmaVerost, et jieh keevti OmaVero, mon maŋa tun finniih reeivâid já miärádâsâid meid Viäruhaldâttuvâst pááppárpostân.
Jis tun kiävtáh OmaVero mut jieh Suomi.fi-viestâid
Jis tun lah kiäldádâttâm Suomi.fi-viestâin mut tubdâttâđah OmaVeron, te tun finniih kiävtun šleđgâhámásii viärupoostâ. Tot uáivild tom, et tun finniih Viäruhaldâttuv vuolgâttem reeivâid tuše OmaVeron. Ko tun almottah jieijâd šleđgâpostâčujottâs tâi puhelinnummeer, te tun finniih tiäđu uđđâ viäruttemmiärádâsâin, viärukoortâin, čielgimpivduin já Viäruhaldâttuv vuolgâttem eres reeivâin šleđgâpostáin tâi tekstâviestân.
Tun puávtáh meid almottiđ Viäruhaldâttâhân, jis tuu tile muttoo jiehke pyevti innig ášástâllâđ OmaVerost já väldiđ vuástá šleđgâhámásii viärupoostâ.
Ášástâllâm nube ulmuu peeleest OmaVerost
Jis tust lii vuoigâdvuotâ tâi väldikirje tipšođ nube ulmuu aašijd OmaVerost, te tun puávtáh tiiláđ jieijâd šleđgâpoostân tiäđu, ko nubbe olmooš lii finnim reeivâ OmaVeron. Tun puávtáh finniđ almottâs täin tilálâšvuođâin:
- Tust lii Viäruaašij tipšom -väldikirje (Veroasioiden hoito -valtuus) já ášástâlah väldikirje adeleijee peeleest OmaVerost.
- Tun lah vyeliahasii párnáá aitârdeijee.
- Tun lah priivaat hiäđukoccee tâi hiäđukocceemváldálâš.
Ko tust lii Viäruaašij tipšom -väldikirje já finniih tiäđu nube ulmuu viärupoostâst šleđgâhäämist, te tot ij vaaigut toos, moin naalijn olmooš jieš finnee Viäruhaldâttuv vuolgâttem reeivâid. Persovnlii viärupoostâ toimâttemvyehi muttoo pápárist šleđgâháámán tuše talle, ko väldikirje adeleijee jieš čáládât OmaVeron já ášástâl palvâlusâst jieijâs ašijguin.
Valduuttum olmožin tun puávtáh meid almottiđ OmaVerost, et olmooš, kiän aašijd tun tipšoh, ij keevti OmaVero.
Jis ulmust lii Viäruhaldâttuv äššigâsregisterân merkkejum äššitipšoo, te miärádâsah já reeivah toimâttuvvojeh tuše äššitipšoi tast sorjohánnáá, et ášástâl-uv olmooš jieš OmaVerost.
Irâttâsäššigâsah: Šleđgâhámásâš viärupostâ sajanpiäjá pááppárreeivâid
Jis irâttâs šleđgâhámásâš viärupostâ lii jo kiävtust, te irâttâs finnee puátteevuođâst-uv reeivâid já miärádâsâid šleđgâhäämist OmaVeron.
12.1.2026 rääjist šleđgâhámásii viärupoostâ finnejeh OmaVeron čáládâttâm ohtâvuođâst puoh
- siärváduvah, uásusseervih, almossiärváduvah, ovtâstusah já siätuseh
- ohtsâšovdâdâsah
- ovtâstumeh
- ärbipeesih, main lii Y-tubdâldâh já äššitipšost Suomi-väldikirje Viäruaašij tipšom.
Keevâtlávt sirdum šleđgâhámásii viärupoostân tábáhtuvá siämmást, ko olmooš, kiäst lii noomâčäällimvuoigâdvuotâ tâi Viäruaašij tipšom -väldikirje, tubdâttât OmaVeron já väljee liiŋkâ “Asioi yrityksen puolesta” (”Ášástâl irâttâs peeleest”).
Siämmást lii tehálâš almottiđ šleđgâpostâčujottâs, moos Viäruhaldâttâh vuolgât tiäđu talle, ko OmaVerost láá uđđâ miärádâsah tâi reeivah. Jis tun jieh almoot ohtâvuotâtiäđuid viestâ várás, te tun ferttiih jieš čuávvuđ OmaVero, vâi finniih tiäđu uđđâ reeivâin.
Viäruhaldâttuv vuolgâttem reeivah láá OmaVerost. Tun kaavnah taid OmaVerost Yhteydenpito-koskâloostâst (Ohtâvuođâ toollâm) saajeest Päätökset ja kirjeet (Miärádâsah já reeivah). Siämmáš äšši ij vuolgâttuu maŋeláá pááppárpostân.
Lasetiäđuh
Nubástusah vuáđuduveh joođoost leijee virgeomâháid kyeskee almolâšlahâaasâtmân sehe ton tievâsmittee Viäruhaldâttuv sierânâslahâaasâtmân. Ulmen lii iärrás lasseen pyerediđ virgeomâhái vuolgâttem reeivâi tiätutorvo, visásmittiđ reeivâi jotelis puáttim vuástáväldee orroomsaajeest sorjohánnáá já čokkiđ tehálijd reeivâid siämmáá sajan.
Ulmen, lii et laavah šaddeh vuáimán 12.1.2026.