Digitála vuoruheapmi: Reivvet dušše elektrovnnalaččat jagi 2026

Vearrohálddahusa ja eará eiseválddiid reivvet doaimmahuvvojit dušše elektrovnnalaččat jagi 2026 rájes buohkaide, geat geavahit elektrovnnalaš áššemeannudanbálvalusaid, dego OmaVero.

Dálá áigge poastta elektrovnnalaš doaimmahanvuohki vuođđuduvvá miehtamii dahjege válljemii váldit atnui Suomi.fi-dieđáhusaid dahje fitnodaga elektrovnnalaš vearropoasta. Jođus lean láhkaásaheami nuppástusaid mielde poastta doaimmahanvuohki rievdá elektrovnnalažžan buohkaide daidda, geat geavahit elektrovnnalaš áššemeannudanbálvalusaid. Báberreivviid ožžot dušše sii, geat eai geavat elektrovnnalaš bálvalusaid.

Mo ja goas rievdá reivviid doaimmahanvuohki?

Juos lága fápmuiboahtimis eai leat vel anus Suomi.fi-dieđáhusat dahje fitnodaga elektrovnnalaš vearropoasta, nuppástus dáhpáhuvvá čuovvovaččat:

• Persovdnaáššehas dahje doaibmanammafitnodat: Go čálihat sisa OmaVeroi dahje juoga eará virgeoapmahaččaid áššehasbálvalussii 12.1.2026 dahje dan maŋŋá, de oaččut sierra virgeoapmahaččaid reivviid, mearrádusaid ja rehkegiid boahttevuođas dušše elektrovnnalaččat. Vearrohálddahusa reivviid ja mearrádusaid oaččut dušše OmaVero bokte. Oaččut dieđu ođđa reivviin, omd šleađgapoastta bokte, jos leat almmuhan iežat šleađgapoastačujuhusa.
• Searvvuš, searveovdu, ovttastus dahje jápminbeassi, mas lea Y-dovddaldat: Go vearroáššiid dikšon olmmoš čáliha sisa OmaVeroi 12.1.2026 dahje dan maŋŋá, searvvuš, searveovdu, ovttastus dahje jápminbeassi oažžu boahttevuođas Vearrohálddahusa reivviid ja mearrádusaid dušše elektrovnnalaččat OmaVeroi. Almmuhus ođđa reivviin boahtá šleađgapoastta bokte, jos leat almmuhan dan várás šleađgapoastačujuhusa.

Persovdnaáššehas dahje doaibmanammafitnodatdoalli: Suomi.fi-dieđáhusat bohtet báberpoastta sadjái

Jos geavahat jo Suomi.fi-dieđáhusaid, oaččut dás ovddosguvluige reivviid ja mearrádusaid elektrovnnalaččat.

Jos it leat váldán Suomi.fi-dieđáhusaid atnui, oaččut bálvalusa geavahussii 12.1.2026 dahje dan maŋŋá, seammás duođaštat identitehta ovdamearkka dihtii OmaVeroi, Palkka.fi:i dahje sisaboahtoregistarii. Identitehta duođašteami oktavuođas dutnje ráhkaduvvo automáhtalaččat elektrovnnalaš poastakássa Suomi.fi-dieđáhusaide. Dát nuppástus guoská dievasahkásaš priváhtaolbmuid ja doaibmanammafitnodatdoalliid.

Suomi.fi-dieđáhusat lea Digi- ja álbmotdiehtodoaimmahaga bálvalus, masa sierra eiseválddiid sádden reivvet, mearrádusat ja rehkegat bohtet. Geavatlaččat oaččot Vearrohálddahusa ja máŋggaid earáid eiseválddiid sádden poastta dás ovddosguvlui dušše elektrovnnalaččat. Seamma ášši ii boađe maŋŋeleappos báberpoastan.

Suomi.fi-dieđáhusaide boahtán reivviid sáhttá lohkat Suomi.fi-mobiilaheivehusain dahje neahttasiiddus suomi.fi/viestit. Vearrohálddahusa sádden reivvet ja earát áššegirjjit leat álo OmaVeros eaige dat doaimmahuvvo Suomi.fi:i. Gávnnat daid OmaVeros Gulahallan-siiddus sajis Mearrádusat ja reivvet.

Oaččut dieđu ođđa reivviin dieđáhusa bokte, jos leat almmuhan dan várás iežat šleađgapoastačujuhusa Suomi.fi-dieđáhusaide dahje šleađgapoastačujuhusa dahje telefonnummira OmaVeros. Jos it almmut oktavuođadieđuid dieđáhusaid várás, don fertet ieš čuovvut Suomi.fi-dieđáhusaid ja OmaVero, vai oaččot dieđu ođđa reivviin.

Jus it sáhte vuostáiváldit reivviid elektrovnnalaččat

Oaččut reivviid Vearohálddahusas ja eará virgeoapmahaččain viidáseappotge báberpoastan, jus it 12.1.2026 rájes geavat OmaVero ja it duođaš identitehta eará áššehasbálvalusaide.

Jos baicce háliidat sirdásit Suomi.fi-dieđáhusain ruovttoluotta báberboastta vuostáiváldin, de sáhtát dan almmuhit Suomi.fi-dieđáhusaid stellemiin. Oaččut goittotge Vearrohálddahusas sáddejuvvon reivviid áin elektrovnnalaččat, jus don leat duođaštan identitehta OmaVeroi 12.1.2026 maŋŋá. Sáhtát almmuhit Vearrohálddahussii ovdamearkan OmaVeros, ahte it geavat OmaVero, man maŋŋá oaččut reivviid ja mearrádusaid maiddái Vearrohálddahusas báberpoastan.

Juos geavahat OmaVero muhto it Suomi.fi-dieđáhusaid

Jos don leat biehttalan Suomi.fi-dieđáhusain muhto duođaštat iežat identitehta OmaVeroi, de oaččut atnui elektrovnnalaš vearropoastta. Dat mearkkaša ahte don oaččut Vearrohálddahusa sádden reivviid dušše iežat Omaveroi. Go almmuhat du šleađgapoastačujuhusa dahje telefonnummira, de oaččut dieđu ođđa vearuhusmearrádusain, vearrokoarttain, čilgehusbivdagiin ja eará reivviin, maid Vearrohálddahus sádde, šleađgapoastta dahje SMS-dieđáhusaid bokte.

Sáhtát maiddái almmuhit Vearrohálddahussii, jos du dilli rievdá ja it šat sáhte dikšut áššiid OmaVeros ja vuostáiváldit elektrovnnalaš vearropoastta.

Áššiid dikšun nuppi olbmo ovddas OmaVerossa

Jus dus lea vuoigatvuohta dahje fápmudus dikšut nuppi olbmo áššiid OmaVeros, de sáhtát diŋgot iežat šleađgapoastta bokte dieđu, go nubbi olmmoš lea ožžon reivve OmaVeroi. Sáhtát oažžut almmuhusa čuovvovaš diliin:

• Dus lea Vearroáššiid dikšun -fápmudus ja don divššut áššiid fápmudeaddji ovddas OmaVeros.
• Don leat vuolleahkásaš máná fuolaheaddji.
• Don leat juogo priváhta ovddugohcci ovddugohcináittardeaddji.

Go dus lea Vearroáššiid dikšun -fápmudus ja oaččut dieđu nuppi olbmo vearropoasttas elektrovnnalaččat, de dat ii váikkut dasa, man vuogi mielde olmmoš ieš oažžu daid reivviid maid Vearroeiseváldi sádde. Persovnnalaš vearropoastta doaimmahanvuohki rievdá báhpáris elektrovnnalažžan dušše dalle, go fápmudusa addi ieš duođašta identitehtas OmaVeroi ja dikšu bálvalusas iežas áššiidis.

Fápmuduvvon olmmožin don sáhtát maiddái almmuhit OmaVeros, ahte olmmoš, gean áššiid don fuolahat, ii geavat OmaVero.

Jus olbmos lea Vearrohálddahusa áššehasregistarii merkejuvvon áššiiddikšu, mearrádusat ja reivvet doaimmahuvvojit dušše áššiiddivššárii fuolakeahttá das, dikšugo olmmoš ieš áššiidis Omaveros.

Fitnodatáššehasat: Elektrovnnalaš vearropoasta buhtte báberreivviid

Jus fitnodaga elektrovnnalaš vearropoasta lea juo anus, de fitnodat oažžu dás duohkoge reivviid ja mearrádusaid elektrovnnalaččat Omaveroi.

12.1.2026 rájes elektrovnnalaš vearropoastta ožžot atnui OmaVeroi identitehtas duođašteami oktavuođas buohkat

• servošat, dego oasussearvvit, almmolašservošat ja foanddat
• searvvušovddut
• ovttastumit
• jápminbeasit, main lea Y-dovddaldat ja áššiiddivššáris Suomi-fápmudus Vearroáššiid dikšumii.

Geavatlaččat sirdáseapmi elektrovnnalaš vearropostii dáhpáhuvvá oktanaga dainna, ahte olmmoš, geas lea vuolláičállinvuoigatvuohta dahje Vearroáššiid dikšun -fápmudus, duođašta iežas identitehtas OmaVeroi ja vállje liŋkka "Divššo áššiid fitnodaga ovddas".

Seammás lea dehálaš almmuhit šleađgapoastačujuhusa gosa Vearrohálddahus sádde dieđu go Omaveros leat ođđa mearrádusat dahje reivvet. Jus it almmut oktavuođadieđuid dieđáhusaid várás, de fertet ieš čuovvut OmaVero vai oaččut dieđu ođđa reivviin.

Vearrohálddahusa sádden reivvet leat OmaVeros. Gávnnat daid OmaVeros Gulahallan-gaskabláđi vuolde Mearrádusat ja reivvet. Seamma ášši ii boađe maŋŋelis báberpoastta bokte.

Lassedieđut

Nuppástusat vuođđuduvvet virgeoapmahaččaid guoski oktasašláhkaásaheapmái, mii lea jođus, ja Vearrohálddahusa sierraláhkaásaheapmái, mii dievasmahttá dan. Ulbmil lea earret eará buoridit daid reivviid diehtosihkarvuođa maid virgeoapmahaččat sáddejit, sihkkarastit ahte reivvet jođánit ollejit vuostáiváldái su báikkis beroškeahttá ja čohkket dehálaš reivviid seamma báikái.

Lágat leat oaivvilduvvon boahtit fápmui 12.1.2026.

Ráđđehusa evttohus riikkabeivviide láhkaásaheapmin, mii guoská elektrovnnalaš diehtunaddima vuoruheami virgeoapmahašdoaimmas (suomagillii)

Ráđđehusa evttohus riikkabeivviide láhkaásaheapmin, mii guoská elektrovnnalaš diehtunaddima Vearrohálddahusas (suomagillii)

Digi- ja álbmotdiehtodoaimmahat: Digitála virgeoapmahašgulahallama vuoruheami ollašuhttinfidnu, Digi vuos -fidnu, 2024–2027 (suomagillii)