Dieđut riikkaidgaskasaš bargamis – skovvi ja deavdinráva (6105)

Dieđut riikkaidgaskasaš bargamis (TULOR 6105) addojuvvo dalle, go boađuoažžu bargá olgoriikkain guhkit áigodaga. Ovttaskas oanehis bargomátkkiin ii dárbbaš addit almmuhusa.

Almmut skoviin dáid olgoriikkas bargamii laktáseaddji dieđuid:

• NT1 – Almmuhus ovdavearrogeassima doaimmaheamis Suomas, bargan eará Davviriikkas
  
  • Atte almmuhusa 8 beaivvi siste dan máksinbeaivvis, man beaivve vuosttas háve máksojuvvo bálká bargamis nuppi Davviriikkas.
• NT2 – Almmuhus ovdavearrogeassima doaimmakeahttá guođđimis Suomas, bargan olgoriikkain.
  
  • Atte almmuhusa 8 beaivvi siste dan máksinbeaivvis, man beaivve ovdavearrogeassin guđđojuvvo vuosttas háve doaimmakeahttá Supmii.
• Bargoaddi almmuhus orrunáigodagain Suomas – Almmuhus olgoriikkas bargamii laktáseaddji orrunáigodagain Suomas, jos ovdavearrogeassimis lea heivehuvvon guđa mánotbaji njuolggadus
  
  • Atte almmuhusa maŋimustá máksojagi čuovvovaš jagi ođđajagimánu loahpa rádjai.

Dállodoalut ja jápminbeasit, mat eai leat merkejuvvon Vearrohálddahusa bargoaddiid registarii, sáhttet addit NT1- ja NT2-almmuhusaid báberskoviin maŋimustá bálkámáksinbeaivvis čuovvovaš mánotbaji 8. beaivve.

Dárkkis dán rávvaga čuoggás Skovvetiippa, makkár dilis guđege almmuhusa galgá addit.

Almmut dárbbu mielde maid bálkkáid ja eará máksojuvvon mávssuid bálkádiehtoalmmuhusain:

Deavdinráva– Bálkádiehtoalmmuhus (6101)

Deavdinráva – Viiddes bálkádiehtoalmmuhus (6104)

Oahpásmuva maid eará sámegielat rávvagiidda:

Deavdinráva – Bargoaddi sierraalmmuhus (6103)

Deavdinráva – Láigobargi álggahanalmmuhus (6106)

Viečča skovi

Vállje skovi máksinbeaivvi mielde. Ovdamearkka dihte jos máksinbeaivi lea jagi 2024 áigge, geavat jagi 2024 skovi. Jos vuiget ovdal dahkkon almmuhusa, geavat gažaldatvuloš jagi skovi.

Máhca suomagielat rávvagii ja viečča skovi: Dieđut riikkaidgaskasaš bargamis / Tiedot kansainvälisestä työskentelystä (6105)

Lonuheamen suomagielat siiddu giela fidnet skovi ja deavdinrávvaga suoma-, ruoŧa- dahje eaŋgalsgillii.

Deavdinráva – Dieđut riikkaidgaskasaš bargamis

Deavdde skovi fuolalaččat. Jos almmuhus lea devdojuvvon boastut dahje dieđut váilot, almmuhus hilgojuvvo. Hilgojuvvon almmuhus ii vurkejuvvo boahtoregistarii.

Jos dárbbašat dárkilut dieđuid sierralágan almmuhandiliin, oahpásmuva rávvagiidda:

Riikkaidgaskasaš dilit boahtoregistaris / Kansainväliset tilanteet tulorekisterissä

Dárkilis boahtoregistara rávvagat / Yksityiskohtaiset tulorekisterin ohjeet

Maid min áššehasbálvalus veahkeha almmuheapmái laktáseaddji gažaldagain:

Áššehasbálvalusa oktavuohtadieđut / Asiakaspalvelun yhteystiedot

Deavdde almmuhussii čuovvovaš dieđuid

• Almmuhusa dovddaldatdieđut
• Skovvetiippa
• 1. Máksi
• 2. Boađuoažžu
• 3. Barganriika ja fásta doaibmabáiki
• 4. Bálká sihke eará buhtadusat ja ovddut
• 5. Orrunáigodagat Suomas
• 6. Bargogohčusaddi
• 7. Beaivi ja vuolláičálus

Almmuhusa dovddaldatdieđut

Deavdde skovi juohke siiddu badjeoassái almmuhusa dovddaldatdieđuid. Dovddaldatdieđut galget leat ovttaláganat buot skovi siidduin. Dovddaldatdieđut leat:

• doaibmabiju tiipa
• bálkámáksinbadji
• almmuhanbeaivi
• mávssu máksi almmuhančujuhus.

Doaibmabiju tiipa

Ceahkas, leago gažaldagas ođđa almmuhus, buhttedeaddji almmuhus vai almmuhusa fámuhuhttin. Sáhtát válljet dušše ovtta doaibmabiju tiippa. Diehtu lea bákkolaš.

Ođđa almmuhus lea gažaldagas dalle, go almmuhat dieđuid riikkaidgaskasaš bargamis vuosttas háve.

Buhttedeaddji almmuhus addojuvvo, go ovddit almmuhusa galgá vuiget. Buhttedeaddji almmuhusas galgá addit buot dieđuid ođđasis, nappo ođđa ja rievdan dieđuid lassin galgá addit maid ovddit almmuhusas leamašan rivttes dieđuid. Buhttedeaddji almmuhusas galgá addit ovddit almmuhusa almmuhančujuhusa.

Almmuhusa fámuhuhttin válljejuvvo, go ovddit addojuvvon almmuhus fámuhuhtto ollásit. Fámuhuhttima oktavuođas reahkká, ahte almmuha doaibmabiju tiippa lassin mávssu máksi dovddaldaga ja ovddit almmuhusa almmuhančujuhus, man vuođul fámuhuhttin čujuha rivttes almmuhussii. Almmuhusa gánneha fámuhuhttit easka dalle, go ođđa almmuhus lea addojuvvon.

Vaikko dieđuid vuigen boahtoregistaris dahkkojuvvo dábálaččat buhttejeaddji almmuhusain, leat dihto dáhpáhusat, main dieđuid ii sáhte vuiget buhttedeaddji almmuhusain. Dan sadjái ovdal addojuvvon almmuhusa galgá fámuhuhttit ja dan maŋŋá galgá addit ođđa almmuhusa rivttes dieđuiguin. Dákkáraš dáhpáhusat leat ovdamearkka dihte:

• almmuhanbeaivvi vuigen
• bálkámáksinbaji vuigen
• mávssu máksi ja boađuoažžu áššehasdovddaldagaid vuigen
• boađuoažžu riegádanáiggi vuigen.

Bálkámáksinbadji

Almmut bálkámáksinbaji álgo- ja loahppabeaivvi. Almmut álgo- ja loahppabeaivve hámis bbmmjjjj, ovdamearkka dihte 01052022–31052022. Bálkámáksinbadji lea áigodat, mas bálká máksojuvvo. Diehtu lea bákkolaš.

Almmuhanbeaivi

Merke almmuhanbeaivvi hámis bbmmjjjj. Ovdamearkka dihte 15.5.2022 addon almmuhusa beaivemearri almmuhuvvo hámis 15052022. Diehtu lea bákkolaš.

Mávssu máksi almmuhančujuhus

Mávssu máksi almmuhančujuhus spesifisere máksi addin bálkádiehtoalmmuhusaid. Jos hábmet čujuhusa ieš, dat galgá leat earálágan juohkehaš ođđa almmuhusas. Dán čuoggá sáhttá guođđit maid guorusin, dalle boahtoregisttar hábme máksi almmuhančujuhusa du beales. Dalle almmuhančujuhus sáddejuvvo reiven dan čujuhussii, mii máksái lea merkejuvvon álbmot- dahje fitnodatdiehtovuogádahkii.

Almmuhančujuhus lea dehalaš, dasgo seamma almmuhančujuhusa galgá geavahit dalle, jos almmuhusas leat leamaš feaillat ja dan galgá vuiget. Almmá almmuhančujuhusa haga buhttedeaddji dahje fámuhuhtti almmuhusa ii boahtoregistaris sáhte čujuhit dan almmuhussii, maid háliida vuiget. Dan dihte mávssu máksi almmuhančujuhus lea bákkolaš diehtu, jos vuiget ovddit almmuhusa dahje fámuhuhtát dan.

Almmuhančujuhus sáhttá leat eanemustá 40 mearkka guhkkosaš. Dat sáhttá sisttisdoallat sihke bustávaid ja nummiriid muhto ii gaskamearkkaid. Dohkálaš mearkkat leat nummirat 0–9, bustávat a–z ja A–Z sihke sierramearkkat”_” ja ”-”. Fuomáš, ahte bustávat å, ä ja ö eai leat dohkálaš mearkkat.

Skovvetiipa

Vállje, man skovvetiippa almmuhus guoská: NT1, NT2 vai bargoaddi almmuhus orrunáigodagain Suomas. Fuomáš, ahte ovttain báberskoviin sáhttá addit dušše ovtta skovvetiippa mielde almmuhusa.

NT1-almmuhus addo dalle, go Suomas ássi boađuoažžu (dábálaččat vearrogeatnegas) bargá nuppi Davviriikkas (Islánda, Norga, Ruoŧŧa, Dánmárku sihke Dánmárkku iešstivrenguovlu Fearasullot – earet Ruonáeana) vuollái guhtta mánotbaji. Addimiin NT1-almmuhusa sáhttá sihkkarastit, ahte boađuoažžu ii dárbbaš máksit ovdavearu Suomas doaimmahuvvon ovdavearrogeassima lassin maid barganriikii. Almmuhusain čujuhuvvo barganriikka eiseváldái, ahte ovdavearrogeassin doaimmahuvvo jo Suomas.

Ovdal NT1-almmuhusa deavdima sihkkarastte, ahte buot vuolábealde logahallojuvvon eavttut ollašuvvet:

• bálkká máksá suopmelaš bargoaddi
• boađuoažžu orru barganriikkas eanemustá 183 beaivvi 12 mánotbaji áigge
• gažaldagas ii leat bargofámu láigoheapmi
• barggus máksojuvvon buhtadus ii čuoze bargoaddi barganriikka fásta doaibmabáikki bohtosii (oaččot lassedieđuid fásta doaibmabáikki ja áššái laktáseaddji eavttuid birra Vearrohálddahusas).

Fitnodaga gánneha maid leat oktavuođas barganriikka vearroeiseválddiide erenoamážit dalle, go jearaldat lea huksendoaimmas dahje guhkesáigásaš bargamis. Dábálaččat suopmelaš fitnodagas eai leat barganriikkas vearuhussii laktáseaddji bargoaddigeatnegasvuođat. Ášši gánneha goittot álo sihkkarastit barganriikka eiseválddiin.

NT2-almmuhus addo dalle, go boađuoažžu bargá olgoriikkain badjel 183 beaivvi ja suopmelaš bargoaddi heiveha boađuoažžui guđa mánotbaji vearuhisvuođanjuolggadusa. Dalle boađuoažžui máksojuvvon bálkkás ii doaimmahuvvo Supmii ovdavearrogeassin.

Jos bargi barganriika molsašuvvá muhto boađuoažžui heivehuvvo ain earretláhkai guđa mánotbaji njuolggadus, bargoaddi ferte addit ođđa NT2-almmuhusa.

Bargoaddi almmuhus orrunáiggiin Suomas addojuvvo, jos olgoriikkain bargi boađuoažžu bálkái heivehuvvo guđa mánotbaji njuolggadus. Almmuhusain addojit dieđut áigodagain, goas olgoriikkain bargi boađuoažžu orru Suomas.

Sáhtát almmuhit dieđuid juogo barggu áigge (ovdamearkan oktii mánotbajis), go olgoriikka bargu nohká (jos ollásit olgoriikkas barganáigi lea kaleandarjagi siste), dahje ovtta vearrojagi áiggis go jahki nohká. Almmut ovtta vearrojagi dieđuid goit álo maŋimustá čuovvovaš kaleandarjagi ođđajagimánu loahpas.

1. Máksi

Almmut máksi FS-dovddaldaga ja fitnodaga nama. Jos máksi lea earretláhkai lunddolaš persovdna, almmut suopmelaš persovdnadovddaldaga ja olles nama.

Merke persovdnadovddaldaga dahje FS-dovddaldaga almmuhussii ollislažžan. Ale čále dovddaldaga gieddái dovddaldaga lassin eará dieđuid. Diehtu lea bákkolaš.

Almmut maid lassedieđuid addi oktavuohtaolbmo nama ja telefonnummira.

2. Boađuoažžu

Almmut boađuoažžu ovda- ja sohkanama sihke suopmelaš persovdnadovddaldaga.

Jos boađuoažžus ii leat suopmelaš persovdnadovddaldat, almmut ovda- ja sohkanama, olgoriikka dovddaldaga, riegádanáiggi (hámis bbmmjjjj) ja sohkabeali. Almmut olgoriikka dovddaldaga tiippa ja dovddaldaga riikakoda. Atte dán lassin boađuoažžu čujuhusdieđuid ollislažžan. Jos čujuhus lea olgoriikkas, almmut maid riikakoda.

Ovdamearkkat riikakodain: Suopma = FI, Ruoŧŧa = SE, Norga = NO, Estteeana = EE, Ruošša= RU. Dábálamosit geavahuvvon riikakodat gávdnojit tabeallas dán rávvaga loahpas. Jos riikakoda ii gávdno tabeallas, almmut riikka nama.

Jos boađuoažžus ii leat makkárge áššehasdovddaldat, ceahkas čuoggi boađuoažžus ii leat dovddaldat (Saajalla ei ole tunnistetta). Almmut dalle boađuoažžu ovda- ja sohkanama, riegádanáiggi, sohkabeali ja čujuhusdieđuid.

3. Barganriika ja fásta doaibmabáiki

Atte dáid dieđuid dušše, jos leat addimin NT1- dahje NT2-almmuhusa. Ovttain báberskoviin sáhtát almmuhit dušše ovtta barganriikka ja barganbáikegotti. Almmut barganriikka riikakoda, barganriikka nama ja barganbáikegotti. Barganbáikegoddi lea dat báikegoddi, gos boađuoažžu dábálaččat bargá. Almmut boađuoažžu čujuhusa barganriikkas sihke riikakoda.

Almmut vearuhusa guoski dieđuid ceahkastemiin čuoggá Juo dahje Ii (Kyllä tai Ei). Almmut boađuoažžu orrunáigodaga barganriikkas. Jos nohkanbeaivi ii leat dieđus, almmut orruma árvvoštallon nohkanbeaivvi.

Atte dieđuid barganáigodagaid olgoriikkain dušše, jos leat addimin NT2-almmuhusa. Almmut ovtta dahje eanet boađuoažžu barganáigodaga olgoriikkain. Jos barganáigodaga nohkanbeaivi ii leat dieđus, almmut árvvoštallon nohkanbeaivvi.

4. Bálká sihke eará buhtadusat ja ovddut

Atte dáid dieđuid dušše, jos leat addimin NT2-almmuhusa. Almmut boađuoažžui máksojuvvon mánotbaji ruhtabálkká. Jos boađuoažžui leat mákson eará mávssut, lađastala dárkilabbot daid čuoggás Eará buhtadusat ja ovddut (Muut korvaukset ja edut).

5. Orrunáigodagat Suomas

Atte dáid dieđuid dušše, jos leat addimin bargoaddi almmuhusa orrunáigodagain Suomas. Almmut ovtta dahje eanet boađuoažžu orrunáigodaga Suomas. Jos boađuoažžu ii leat orron almmuhanvuloš áigodat áigge ollege Suomas, ceahkas čuoggá Almmuhussii eai gula orrunáigodagat Suomas (Ilmoitukseen ei sisälly oleskelujaksoja Suomessa).

6. Bargogohčusaddi

Atte dáid dieđuid dušše, jos leat addimin NT1-almmuhusa. Doaibmanaddi lea dat bealli, man nammii boađuoažžu bargá barganriikkas (ovdamearkan agoartaváldi, hukseheaddji dahje áššehas). Almmut doaibmanaddi FS-dovddaldaga dahje suopmelaš persovdnadovddaldaga ja nama.

Jos bargogohčusaddis ii leat suopmelaš áššehasdovddaldat, almmut olles nama, olgoriikka dovddaldaga, dovddaldat tiippa ja riikakoda. Almmut dán lassin maid bargogohčusaddi čujuhusdieđuid ollislažžan sihke oktavuohtaolbmo nama ja telefonnummira.

7. Beaivi ja vuolláičálus

Vuolláičále skovi ovdal go sáddet dan. Merke maid beaivemeari ja telefonnummirat.

Máhcahusčujuhus

Sádde skovi čujuhussii:

Tulorekisteri
PL 1
00055 TULOREKISTERI