Du loanat ovtta registaris

Positiivvalaš loatnadiehtoregisttar lea ođđa registtar, masa čohkkejit dieđuid priváhttaolbmuid loanain ja boađuin. Priváhttaolmmožin sáhtát geahčadit registaris iežat loanaid dieđuid sihke dahkat alccet eaktodáhtolaš loatnagildosa.

Registara váldoulbmil lea duostut dállodoaluid badjelmeare vealgáduvvama. Lassin dat veahkeha priváhttaolbmuid iežas ruhtadoalu hálddašeamis.

Kredihtaaddit almmuhit registarii buot geavaheaddjiloanaid. Geavaheaddjiloanat leat ovdamearkka dihte visteloanat, biilaloanat ja golahanloanat. Kredihtaaddit sáhttet maiddái buorebut árvvoštallat ohcciid máksinnávccaid, go registaris leat áigedását dieđut olbmuid loanain ja boađuin.

Lágas meroštallon virgeoapmahaččain lea vuoigatvuohta oažžut dieđu loatnadiehtoregistaris lágas ásahuvvon bargguideaset dikšuma várás. Loatnadiehtoregistara dieđuid ožžot Finanssivalvonta (Finánsagozáhus), Kilpailu- ja kuluttajavirasto (Gilvvohallan- ja golaheaddjivirgedoaimmahat), Rahoitusvakausvirasto (Ruhtadanstáđisvuođavirgedoaimmahat), Suomen Pankki (Suoma Báŋku) sihke Tilastokeskus (Statistihkkaguovddáš).

Mat dieđuid registaris lea mu birra?

Kredihtaaddit almmuhit registarii ovdamearkka dihte dutnje mieđihuvvon

  • visteloanaid
  • biilaloanaid
  • golahanloanaid
  • kredihttakoarttaid
  • oahppoloanaid
  • oassemáksinruhtademiid.

Go dutnje mieđihuvvo ođđa loatna, dan dieđut dihttojit loatnadiehtoregistaris dábálaččat guokte kaleandarbeaivvi siste dan rájes, go soahpamuš ođđa loanas lea dahkkojuvvon.

kredihtaaddit almmuhit registarii maiddái

  • du máksin oanádusaid
  • dieđu du loana nohkamis.

Registarii eai vurke dieđuid du vejolaš máksinhehttehusmerkemiid birra. Kredihtaaddi almmuha goittotge registarii dieđu, juos du loana máksineari máksin lea maŋŋonan badjel 60 beaivvi. Kredihtaaddi sihkku eret dieđu máksinmaŋŋoneamis, go don leat máksán máksineari ollásit eret. Kredihtaaddi sihkku eret dieđu máksinmaŋŋoneamis maiddái dalle, juos soahpabeahtti kredihtaaddiin ođđa máksinprográmma máksinmaŋŋoneami dikšuma várás.

Go ozat loana

Go ozat loana, kredihtaaddi galgá dárkkistit du dieđuid positiivvalaš loatnadiehtoregistaris. Kredihtaaddi diŋgo dan várás loatnadiehtoregisttarváldosa. Kredihtaaddi árvvoštallá du loatnagelbbolašvuođa registtarváldosa dieđuid vuođul.

Mii lea loatnadiehtoregisttarválddus?

Du loatnadiehtoregisttarváldosis leat dieđut

  • du loanain
  • du boađuin maŋimuš 12 mánotbaji áiggis.

Lassin loatnadiehtoregisttarváldosis lea diehtu eaktodáhtolaš loatnagildosis, juos leat dahkan dan.

Dieđut do boađuin nappo dutnje máksojuvvon bálkkáin, ealáhagain ja ovdduin bohtet boahtoregistaris. Boahtodieđut čájehuvvojit loatnadiehtoregisttarváldosis mánotbadjeboahtun maŋimuš 12 mánotbaji áiggis. Juos háliidat geahčadit iežat boahtodieđuid dárkilappot, čálit iežat sisa boahtoregistara elektrovnnalaš áššiiddikšunbálvalussii.

Oahpásmuva boahtoregistarii

Gii oažžu geavahit loatnadieđuid ja makkár ulbmiliidda?

Kredihtaaddit ožžot geavahit loatnadieđuid dušše dárkilit meroštallon geavahanulbmiliidda. Dás lea ásahuvvon detáljalaččat lágas (láhka positiivvalaš loatnadiehtoregistaris).

Kredihtaaddi oažžu diŋgot du loatnadiehtoregisttarváldosa dušše dalle, go

  • ozat ođđa loana
  • ozat jo leahkki loatnasoahpamuššii dakkár nuppástusa, mii gáibida loatnagelbbolašvuođa árvvoštallama
  • áiggot dáhkidit nuppi olbmo loana.

Kredihttaohccin don in sáhte gieldit du dieđuid bivdima.

Gii beare ii oaččo geavahit loatnadieđuid. Ovdamearkka dihte láigoaddis dahje Kelas ii leat vuoigatvuohta bivdit du dieđuid registaris.

Registtar doaibmá du dieđuid sirdin

Positiivvalaš loatnadiehtoregisttar doaibmá dušše du dieđuid sirdin.

Positiivvalaš loatnadiehtoregistaris eai

  • daga loatnamearrádusaid
  • árvvoštala loatnagelbbolašvuođa.

Loatnadiehtoregisttarválddus sáddejuvvo kredihtaaddái, gii dahká loatnamearrádusa iežas kriteraid vuođul. Juos du loatnaohcamuš hilgojuvvo, loatnadiehtoregisttar ii oaččo dieđu du ohcamuša iige dan birra, manin dat lea hilgojuvvon. Loatnadiehtoregistaris ii sáhte maiddái šluhttet jo dahkkojuvvon loatnaohcamuša iige dahkat nuppástusaid fámus orru loatnasoahpamuššii. Dákkár áššiid birra sáhtát ráđđádallat ja soahpat iežat kredihtaaddiin.

Elektrovnnalaš áššiiddikšunbálvalus

Min elektrovnnalaš áššiiddikšunbálvalusas sáhtát geahčadit iežat loanaid dieđuid sihke dahkat eaktodáhtolaš loatnagildosa juos háliidat. Sáhtát maiddái dárkkistit, mat kredihttaaddit leat dáhttun du dieđuid registaris, goas ja makkár ulbmilii. Oainnát maiddái,maid dieđuid sidjiide leat sádden. Elektrovnnalaš áššiiddikšunbálvalusas sáhtát dikšut áššiidat suomagillii, ruoŧagillii ja eŋgelasgillii.

Beasat čálihit iežat sisa elektrovnnalaš áššiiddikšunbálvalussii báŋkodovddaldagaiguin, mobiilanannehusain dahje nannehuskoarttain Suomi.fi-dovdánbálvalusas.

Čálit iežat sisa elektrovnnalaš áššiiddikšunbálvalussii

Nuppi beales áššiiddikšun

Nuppi olbmo beales áššiiddikšuma várás dárbbašat Suomi.fi-fápmudusa. Sáhtát addit nubbái fápmudusa Suomi.fi-fápmudus-bálvalusas.

Juos divššut áššiid nuppi olbmo beales positiivvalaš loatnadiehtoregistara elektrovnnalaš áššiiddikšunbálvalusas, sáhtát dahkat bálvalusas seammá áššiid go olmmoš iešge sáhttá dahkat bálvalusas. Dus lea fápmudusain vuoigatvuohta geahčadit loanaid, addojuvvon dáhkádusaid sihke kredihtaaddiid diŋgon loatnadiehtoregisttarváldosiid dieđuid. Lassin sáhtát dahkat dahje sihkkut eret eaktodáhtolaš loatnagildosa dahje nuppástuhttit dan. Sáhtát maiddái addit dahje váldit eret miehtama dasa, sirdojuvvogo diehtu loatnagildosis maiddái loatnadiehtofitnodagaide.

Eaktodáhtolaš loatnagielddus

Positiivvalaš loatnadiehtoregistara elektrovnnalaš áššiiddikšunbálvalusas sáhtát dahkat alccet eaktodáhtolaš loatnagildosa juos háliidat. Loatnagielddus lea nuvttá. Loatnagildosa dahkan lea vejolaš maiddái báberskoviin.

Eaktodáhtolaš loatnagildosa sáhttá dahkat doaisttážii fámus orrun dahje mearreáigái. Loatnagielddus suddje du ovdamearkka dihte dilis, mas du heaggadieđut leat suoláduvvon ja muhtin viggá ohcat loana du heaggadieđuiguin. Lassin loatnagielddus lea bargoneavvu du iežat ruhtadoalu hálddašeapmái.

Loatnagildosa sivvan válljejuvvo elektrovnnalaš áššiiddikšunbálvalusas okta čuovvovaččain:

  • Identitehtasuolavuođa riska
  • Iežat ruhtadoalu hálddašeapmi
  • Eará sivva

Diehtu du loatnagildosis sirdojuvvo kredihtaaddiide, juos sii diŋgojit loatnadiehtoregisttarváldosa du dieđuin. Juos attát lobi, mii sirdit dieđu du loatnagildosa birra maiddái loatnadiehtofitnodagaide nappo fitnodagaide, mat fállet loatnadiehtobálvalusaid. Ná nu máŋga go vejolaš kredihtaaddi ožžot dieđu du loatnagildosis.

Juos leat dahkan alccet eaktodáhtolaš loatnagildosa, kredihtaaddit galget suokkardallat loana mieđiheami fuolalabbot go dábálaš. Sáhtát sihkkut loatnagildosa eret goas beare.

Sivu on viimeksi päivitetty 17.4.2024